Musejon uartehista kerrotah karjalakši
Karjalan taitomusejon vakituisissa näyttelyissä nyt šuau kuunnella tietoja esitetyistä tauluista, oprasoista ta veššokšista šekä tevokšien luatijista ta niijen taitotyylilöistä karjalan kielellä.
– Meilä on tärkie, jotta musejo olis mukava erilaisilla ihmisillä. Meilä še merkiččöy ruatuo ihmisien kera, kumpasilla on rajotettuja tervehyšmahollisukšie ta šamoin še koškou kielieki. Tahomma, jotta eri kielillä pakasijat ihmiset voitais tulla musejoh ta šuaha palveluja, šano LINGUA-musejo -projektin johtaja Natalja Kozlovskaja.
Audio-opaš kertou musejon 50 uartehešta – taito- ta veššoštevokšista, muinaisesinehistä tai oprasoista. Nyt musejon joka vieraš voipi lipun oštuas’š’a kyšyö oppahan ta kävellä musejuo myöten šen parissa. Niise musejon ta projektin VK-ryhmissä voipi kaččuo käsityömuasteri-opin video ta videokertomuš musejošta. Tekstijä vienakši kiänti ta nauhotti Natalia Pellinen.
LINGUA-musejo -projektie toteuttau Taitomusejo yheistyöššä ei-kaupallisen Kulttuurin ekologija -järještön kera. Šamoin projektin rajoissa valmissettih musejopalveluja vepšän, armenijan, azerbaidžanin ta grusijan kielellä.
