Minun ”Oma Mua”: kilbu karjalankielizen lehten 35-vuozipäiväkse
”Karjalan Rahvahan Liiton” kehoitukses perustettu karjalankieline Oma Mua -lehti täyttäy 35 vuottu. Sen kunnivokse lehti panou rattahile uvven kilvan omih lugijoih da tiluajih niškoi.
— Tahtozimmo, ku kilbah yhtyjen meijän lugijat da tiluajat mustetoittas net aijat, konzu lehti vaste algai oman taibalehen. Potakoiččizimmo kaikkii aktiivizesti yhtymäh kilbah, sanoi Oma Mediale Oma Mua -lehten toimitussekretari Ol’ga Smotrova.
Kilvas on kaksi nominatsiedu. Nominatsieh ”Lehten hetki -valokuva” yhtyjile kilbuniekoile pidäy löydiä omas fotoarhiivas mittuinetahto kuva, kuduas olis ristikanzu, kenen käzis on Oma Mua -lehti. Libo kuvas voibi olla mitahto lehten pido, toimituksen ruadajat.
Nominatsieh ”Oma Mua -lehti minun elaijas” yhtyjile kilbuniekoile pidäy kirjuttua kerdomus, kui hyö tuttavuttih lehteh, kui ruvettih sidä lugemah, midä lehti merkiččöy heile. Paiči sidä kilbuniekku voibi kerduo mistahto materjualas, kudai painui mieleh libo kenestahto toimittajis.
Kilbah otetah kirjutuksii karjalan, ven’an da suomen kielil. Hyvä olis, ku kerdomukseh liittys kuva.
Fotokuvii da kirjutuksii kilbah voibi työndiä oraskuun 20. päiväh suate sähköpoštale.
Kirjazeh pidäy panna merki Minun ”Oma Mua” -kilbah.
Voittajien nimet ilmoitetah Oma Mua -lehten oraskuun jälgimäzes noumeras. Voittajat suajah lahjat.
