Meedikkuabu: suadavis da korgiel tazol
Karjalas vuvvennu 2026 kanzallizen Pitkyaigaine da aktiivine elaigu -projektan mugah kohendetah meedikkualan 10 objektua. Tänävuon kohendetah Belomorskan, Kondupohjan, Louhen, Suojärven, Segežan piiribol’ničat, sego tazavallan Grigovičan nimelline lapsien bol’ničču, Petroskoin lapsien bol’ničču n:u 2 da Petroskoin polikliiniekku n:u 3.
— Karjalan piämiehen Artur Parfenčikovan käskys myö todevutammo pidoloi, kuduat on suunnattu meedikkuavun luavun korrendamizeh da suadavis olemizeh. Se on Karjalan haldivon, tavazallan tervehysministerstvan da meedikkualan laitoksien yhtehizen, alallizen kompleksuruavon tulos, kerdou Karjalan tervehysministran Mihail Ohlopkovan sanoi Karjalan haldivon saitu.
Kaikis meedikkulaitoksis jo algavuttih kohendusruavot. Suurimat remontat pietäh Suojärven piiribol’ničas. Sie kohendetah levo da kogonah vaihtetah levon kai konstruksiet. Segežan bol’ničas uvvistetah ulgoseinät, valattimet nelläl kerroksel, vaihtetah ikkunat, ukset, vezisistiemu. Kondupohjan piiribol’ničas vaihtetah sähkösistiemu, ukset, azetetah uuzi santehniekku. Louhen piiripol’niččah kuulujas Čuupan meedikkulaitokses kohendetah lämmityssistiemu, pordahat, azetetah uvvet ukset. Louhes luajitah uvvet liftat da kohendetah kabinietat.
Tazavallan lapsien bol’ničas kohendetah basseinu, rentgenkabiniettu da liäkärilöin kabinietat. Kanzallizen projektan mugah bol’niččah ostetah laittehistuo 270 miljounua rubl’ua.
Yhty Oman Median kanualah MAX:as!
