MAX jouvuttau kirjuttautumista hotelliloih
Uuši palvelu auttau turistija kirjuttautuo Karjalan hotelliloih MAX-šovellukšen kautti ilman paperidokumenttija. Vierahan on näytettävä hotellin ruatajalla oman Digitalisen ID:n MAX-šovellukšešša. Näin matkuajat šiäššetäh aikua, a kirjattautumini on mukavampi ta turvallisempi. Šamah aikah vierahat šuahah käyttyä asiepaperija. Šiitä ilmottau Karjalan tašavallan piämiehen lehistöpalvelu.
— Digitaliset palvelut avatah uušie mahollisukšie Karjalan turistialalla. Še lisyäy mukavutta vierahilla ta yksinkertaistau hotellinpitäjien ruatuo vähentyän hallintokuormitušta. Olen varma, jotta meijän majotušobjektit aktiivisešti liitytäh täh prosessih, ta Karjala jatkau nykyaikasen ta teknologisešti kehittynyön turistialovehen statussin lujentamista, šano lehistöpalvelulla Karjalan tašavallan talouškehitykšen varaministeri Oksana Gavroš.
Karjalan hotellinpitäjät jo valmistauvutah ruatamah uušien standarttien mukah. Täh aikah tašavallašša on yli 300 majotušobjektie.
Venäjän enšimmäisinä hotelliloina, kumpaset otettih vaštah vierahie MAX:in kautti oltih Four Seasons Hotel ta City Hotel 1905 Moskovašša, Sochii Park Hotel ta Mantera Supreme Seaside Sočissa, Millenium Panorama Kazanissa šekä Cosmos-verkon hotellit Piiterissä. Aloteh kehittyy Turismi ta vierahanvaraisuš -kanšallisprojektin rajoissa.
Aihiešta voit lukie niise šuomekši.
Yhty Oman Median MAX-kanalah!
