Lidnan mugavoičend: enamba 19 tuhad Petroskoin eläjad ühtni änestusehe
Karjalan pälidnan eläjad jatktaba valita puištoid da skveroid, miččed paremboitas vodel 2027. Änestusehe om jo ühtnenu enamba 19 tuhad Petroskoin eläjad. Äniden enambišton saiba Fizkul’turnikov-käveluzkujo, “Patriot”-puišt da Sl’udafabrikan puišt, miš tedotadas Petroskoi-lidnan administracijan oficialižel VKontakte-lehtpolel.
— Täl vodel änestusehe ühtneb ühesa puištod da skverad Petroskoin erazvuiččiš rajonoiš. Nügüdehesai ezmäižel sijal om Kukkovka-rajonan Fizkul’turnikov-käveluzkujo, sanutas Petroskoin administracijan lehtpolel.
Änestada voib kaikutte Petroskoin eläi, kudambale om täudnu 14 vot. Valita puišton vai skveran paremboitusen täht voib kezakun 12. päivähasai internet-lehtpolel.
Sijad mugavoitas “Elämištsija da lidnan elo” -federaližen projektan aigan (se mülüb “Infrastruktur elon täht” -projektaha).
Uzišt neciš temas voib lugeda mugažo suomeks.
Tarkištele "Oma Median" MAX-kanalad!
