Ližiä tugie opastajile
Karjalan piämies käski luadie tugisistieman tazavallan opastajih nähte. Se on luajittu Ven’an prezidentan Vladimir Putinan käskyn peräh. Prezidentu on kannatannuh Yhtehine Ven’a -puoluvehen kehoituksen da allekirjutti käskyn, kudai lujoittau opastajan stuatusan federuallizel tazol.
— Tärgevin ruado nygöi on luadie muga, ku stuatusan tagan olis tovellizii kannatuskeinoloi, sanoi Karjalan piämies omassah lehtistöpalvelule.
Parfenčikov pani merkile kolme piäsuundua: mentoruopastus, ellendettävy da oigienmugaine ruadomaksu da alovehellizen tagukset.
— Meil Karjalas toimiu jo mentoruopastus nuorih liäkärilöih nähte. Nygöi luajimmo moizen opastuksen školis: vahnembi kolleegu auttau teriämbäh harjavuo ruadoh, jagau omua ruadokogemustu, varaittau hairahtuksis, sanoi Parfenčikov.
Karjalan piämiehen sanoin mugah maksu ruavos pidäy olla ellendettävy jogahizele opastajale huolimata sih, kuduas kohtas da mittumas školas häi ruadau. Tazavallan taguksih opastajien kannattamizekse ruvetah kuulumah ilmaine juriidine abu, kudai koskou ruadoriidoi da ilmaine piäzy tazavallan valdivollizih muzeiloih ei harvembah kerdua kuus. Vie eräs tugikeino on paginal: opastajien lapsien päivykodiloih sijoittamine.
Yhty Oman Median kanualah MAX:as!
