Kut täl vodel Karjalas praznuitas Vägestusen päiväd
9. semendkud Karjalas, kut toižiš-ki Venäman regionoiš, praznuitas Suren Vägestusen päiväd. Petroskoiš, Voinan tetabuden lidnas, tehtas äi tematižid azjtegoid erazvuiččiš sijoiš. Siš tedotadas Karjalan Pämehen press-službas.
Karjalan Pämez’ Artur Parfenčikov da Petroskoin pämez’ Inna Kolihmatova starinoičiba tulijan praznikan programmas.
— Ühesanz’ semendkud om päivmär, mitte om tärged kaikuččele kanzale. Nece om meiden ühthižen mušton i ülendusen päiv, konz mö spasiboičem vägestajiden sugupol’ved. Olem vaumištanuded ani bohatan da melentartuižen praznikprogramman Petroskoin eläjiden da adivoiden täht, sanui Artur Parfenčikov.
Praznikan päaigtegon linneb änikoiden i änikpal’mikoiden panendan ceremonii. 10:00 časud homendest nece tehtas “Mušton da Tetabuden käveluzkujo”- da “Tundmatoman saldatan kaum Tetabuden igähižen lämoinke” -memorialoidenno, a 11:15 časud — “Voinan tetabuden lidn” -stelanno.
12:00 časud Kirovan avoirdan päscenal zavodiše sur’ praznikaline koncert. Artistad, kudambiden keskes linneba erazvuiččiden rahvahiden ezitajad, pajataba voinvoziden tetabid pajoid.
14:00 časud mäneb se, midä Karjalan eläjad navediba enamba kaiked: Leninan avoirdalpäi Kirovan avoirdahasai ristitud astuškandeba “Kolmatoi jouk” -astundas. Vastuzsijale tariž tulda 13:00 časuikš.
15:00 časud lidnan irdoil mäneb tradicionaline kebnan atletikan estafet “Vägestusen päiv” -nimel. Nece zavodiše (i lopiše) Kirovan avoirdal, mäneb Karl Marksan prospektadme, Leninan avoirdadme da Gogol’an irdadme.
Päivän aigan adivoid varastab völ äi melentartušt. Teatrozutez (11:30) da “Saldatan pudr” -Ühthižvenälaine akcii (12:30) tehtas Kirovan avoirdal, pidust’ Karl Marksan prospektad ozutadas tematine ozutelust da radaškaba interaktivižed kirjištod, sen ližaks linneb voimuz kacta muzejiden ekspozicijoid, söda “Semendkun kafes” da tehta völ äi tošt. Täuden praznikprogramman voib löuta dokumentas.
Petroskoiš Suren Vägestusen päiv lopiše praznikaližel lämoiambuskelusel.
Uzišt neciš temas voib lugeda mugažo suomeks.
Tarkištele "Oma Median" MAX-kanalad!
