“Kuki-rikku”-videožurnalan uded vipuskad kactihe “Periodikas”
9. vilukud “Periodika”-painišton Karjalan Valdkundan Rahvahiden sebruden kodiš ezitadihe “Kuki-rikku” -lapsiden jumoristižen videožurnalan kaks’ ut vipuskad. Prezentacijale tuliba penikaižed artistad, heiden vanhembad, a mugažo projektan abunikad da sebranikad. Ozutesikš, täl vodel azjtegol oliba Karjalan rahvahaližen da regionaližen politikan ministerstvan ezitai Jekaterina Smirnova, Rahvahaližen teatran akt’or Dmitrii Ivanov da tetab vepsläine runoilii i kirjutai Oleg Mošnikov.
2026. om jubileivoz’: “Kuki-rikku”-projektale om täudnus viž vot, eloho läksi videožurnalan kümnenz’ vipusk. Kaikuččehe vipuskaha mülüb koume videorolikad Karjalan rahvahiden kelil. Uziden vipuskoiden erigoičuz om siš, miše erased videorolikad om tehtud peniden kacujiden scenarijoiden pohjal. “Kuki-rikkun” avtorad tegiba konkursan da valičiba vägestajad: Stepan Ignatjev i Ivan Perec tegihe sceranijoiden konkursan laureatoikš, a Jeva Korobeinikova — vägestajaks.
— Pidab sanuda, miše neniš voziš meiden videožurnal om vajehtanus: mö kaiken aigan naprim paremboita sidä, tehta rolikoid melentartuižembikš, miše ned oližiba ilokahad i veslad. Kaikuččel vodel meile tuleb enamba lapsid — ozitesikš, sil vodel sjömkoihe ühtni enamba 20 last, a mugažo enamba Karjalan Rahvahaližen teatran akt’oroid, starinoiči “Oma Media” -portalale üks’ “Kuki-rikku”-projektan avtoroišpäi Maria Šašina.
Prezentacijal oli ani sebraline il’mišt: adivod hüviš meliš kacuiba uzid vipuskoid, kaikjal kului nagrand. Galina Baburova da Maria Šašina tegiba penikaižile artistoile da heiden vanhembile melentartuižed i veslad konkursad, vaumištiba čomad lahjad kaikuččele ühtnikale. Azjtegon lopus kaik adivod ühtes joiba čajud da tegiba fotoid čomas fotozonas.
“Kuki-rikku” -jumoristižen žurnalan ezmäižed rolikad läksiba eloho vodel 2021. Kaikuččel vodel tehtas kaks’ vipuskad. Projektad rahatugedab Karjalan rahvahaližen da regionaližen politikan ministerstv.
Edeližiden sezonoiden vipuskad voib kacta projektan VKontakte-gruppas.
Uzišt neciš temas voib lugeda mugažo venäks.
Tarkištele "Oma Median" Telegram-kanalad!
