Konstantin Tarasov: “Filologijan ala vähenöy”
Šajekuun 11. päivänä Karjalan kanšallisen ta alovehellisen politiikan ministerijön tiloissa vietettih Karjalan piämiehen rinnalla toimijan karjalaisien, vepšäläisien ta šuomelaisien etuštajien neuvošton issunto. Petroskoin valtijonyliopiston vararektori Konstantin Tarasov kerto Itämerenšuomelaisen filologijan laitokšen nykyelämäštä, šuavutukšista ta proplemoista.
— Valitettavašti, filologijan ala vähenöy. Joka vuosi Petroskoin valtijonyliopiston filologijan instituutti šuau Venäjän opaššušministerijöltä yhä pienempie hyväkšyntälukuja. Vuotena 2021 šaima 55 paikkua, vuotena 2022 — 53 paikkua, a vuoteh 2023 meilä annettih 49 paikkua, šaneli Konstantin Gennadjevič.
Vararektorin mukah yliopiston etuštajat yritettih muuttua tilannehta ta korottua paikkojen miäryä kanšalliskielien alalla, ka še ei antan tulokšie. Šamah aikah filologijan ala on šuosittu ta kilpailu kašvau joka vuosi.
— Riittäväšti paikkoja on Alkukoulutuš ta oma kieli -alalla. Niise on tarkotušpaikkoja. Ka tänä vuotena oli vain yksi abiturientti. Emmä avannun tätä alua. Pimiekuuh šuaten meijän pitäy piättyä, annammako šillä alalla b’utžettipaikkoja, korošti Konstantin Tarasov.
— Jotta täyventyä niitä paikkoja pitäy ruatua ministerijöjen tašolla. Još haluomma houkutella abiturienttija tarkotušpaikkoih, pitäy valmistua tehokkahie kannatuš keinoja, on varma Konstantin Tarasov.
