“Kodima” vasttab sügüst
Sügüz’kun nomeran täht “Kodima”-lehtesen toimišt vaumišti melentartuižed materialad udištadud Kalagen školas, azjtegoiš Marii Elan mal da Piteriš, Vladimir Jetojevan matkas Šimjärvele i Oleg Mošnikovan — Podporožjehe da äjad toižed. Kut i tobjimalaz, udes nomeras om kirjutusid melentartuižiš ristituiš-ki. Heiden keskes om Rürik Lonin, hänen panend vepsläižehe kul’turaha om lujas tärged da sur’, a mugažo Alevtina Lutohina — Šokšun eläi, prostan vepsän rahvahan ezitai, kudamb armastab ičeze kel’t da hilläšti kaičeb vanhad kul’turad.
— Meile om tärged ei vaiše tedotada uzištoiš da aigtegoiš, no i antta materialad meletandan täht. Ozutesikš, sihe nomeraha om ottud Vladimir Jetojevan kirjutuz ekspedicijas Šimjärvehe, kus om äi meletusid sen agjan čomudes, männudes aigas, ezitatoiden kaceges miruhu... Nece kirjutuz tegihe ani filosofižeks, starinoičeb “Oma Media” -portalale “Kodiman” pätoimitai Irina Sotnikova.
Tahtoiše meletada literaturišt lehtpol’t lugedes-ki: sigä om P’otr Vasiljevan lühüdad starinad da Viktor Trifojevan čomad runod, miččed om täuttud sügüzližel opalal da elon filosofijal.
“Kodima”-lehtest voib otta “Periodika”-painištos ilma maksuta.
