Koštamukšen lapšie kučutah tutuštumah karjalan kieleh
Koštamukšen koulun ulkopuolisen ruavon keškukšešša avautuu uuši Ihmehellini karjalan kieli -kerho 8–11-vuotisilla lapšilla.
— Oppituntien rajoissa lapšet ruvetah opaštumah karjalan kieltä, tutuštumah karjalaisen rahvahan kulttuurih, istorijah ta perintehih. Šamoin hyö opaššutah kirjuttamah ta lukomah karjalan kielellä, šuahah tietyä šen ihmehellisen kielen erikoisukšista, opaššutah laulamah lauluja ta lukomah runoja karjalan kielellä, tutuššutah meijän piirikunnan folklorikollektiiviloih ta ošallissutah muasteri-oppiloih. Meijän kotišeuvulla on ainutluatuni istorija ta kulttuuri, ta on erikoisen tärkietä, jotta meijän tulija šukupolvi ymmärtäis tätä ainutluatuisutta, arvoštais ta tykkyäis omua kotišeutuo, kerrotah Koulun ulkopuolisen ruavon keškukšen spesialistit poštaukšeššah Vkontaktešša.
Kerhoh otetah vaštah kakši ryhmyä. Oppitunnit on tarkotettu 8—11-vuotisilla lapšilla. Yksi ryhmä rupieu opaštumah joka enšiarki, a toini — joka piätinččä. Oppitunnit aletah klo 15:00 ta loputah klo 16:30. Enšimmäini oppitunti lapšilla ta vanhemmilla vietetäh 15. pimiekuuta Koulun ulkopuolisen ruavon keškukšešša klo 15:00.
Yhty Oman Median Telegram-kanalah!
