“Kipinä” valmistautuu Uuteh vuoteh ta luatiu korissukšie
Uuši vuosi on jo kynnykšellä. Kipinä-lehen pimiekuun numeron šivuja šeluallen šie löyvät pruasniekalla omissettuja šivuja: luvet Hiiri meččäh mänöy -kanšanrunon ta L’ubov’ Baltazaran runon talvešta šekä Vitalii Biankin Lumikniigu -kertomukšen, peluat Talvimečäs-pelih ta šuat tietyä karjalaisien talvikuukaušien nimistä.
— “Kipinän” verekšeššä numerošša lapšilla on ehotettu heti kolme muasteri-oppie, kumpasien avulla lapšet opaššutah luatimah rihmatähtisie uuvvenvuuvven kuušen koristamista varoin, lumikenkie ta mussikan marjan muotosie korvarenkahie polimerišavešta. A uuvven kuvalehen korissukšena on vuuvven 2025 kirkaš ta kaunis kalenteri, kumpasen piirušti taiteilija Margarita Jufa šekä hyvittelykortit Uuvvekši vuuvvekši ta Roštuokši kertou “Kipinän” toimittaja Maikki Remšujeva.
Šamoin kuvaleheštä šie löyvät Sergei Georgijevin mukavie kertomukšie enšiluokkalaisešta Matti Vatasešta ta šuat tietyä, mimmoni lemmikki šiula paššuau. Aleksandra Bronzovan Rauvan kertomat jutut -kirjutukšešta šie tiijuššat mitein karjalaiset valmissettih rautua. A Valentina Mironova artikkelissah “Kylytöi suovattu da piiruatoi pyhäpäivy ei makseta nimidä” kertou šiula perintehistä, mit oli šivottu kylyn käyntih.
Kuin ainaki “Kipinäštä” löytyy kiinnoštavie tehtävie ta aivopähkinöjä purtavakši šekä kuva värjyämistä varoin.
