“Kipinä”-kulehtesen radnikad starinoičiba lapsile “Kalevalas”
Tämbei, 7. sulakud, “Kipinä” -lapsiden kulehtesen radnikad Jana Filimonkova da Ol’ga Demidova oliba Petroskoin Suomalaiž-ugrilaižes školas. Nece azjtego oli tehtud “Kalevalan” marafon” -akcijan aigan. Akcii zavodihe 28. uhokud, “Kalevalan” päiväl, da lopiše 9. sulakud, Suomen kelen päiväl.
Vastusele “Kipinän” radnikoidenke tuli 12 openikad 4.–5. klassoišpäi — nene lapsed opendaba školas karjalan vai vepsän kel’t. Ezmäi pagištihe “Kalevala”-eposas, adivod vediba lapsiden täht penen viktorinan. Sen jäl’ghe openikoile starinoitihe “Kipinä”-kulehteses, sikš ku enambišt heišpäi völ ei ehtnugoi tundištadas senke. Vastusen lopus Ol’ga Demidova, kulehtesen taidehtoimitai, vedi “Kalevala”-kaičii”-mastar’-klassan, miččen aigan lapsed tegiba ripken. Ripkel oli kaks’ palad: Väinämöižen pä da kantele — nece kaik tehtihe kartonaspäi da mujutadihe erazvuiččil mujuil. Mastar’-klassan aigan Ol’ga i Jana starinoičiba openikoile kantelen polhe: necen muzikvändimen istorijas da znamoičendas Karjalan rahvahiden täht.
— Mö radam ühtes Suomalaiž-ugrilaižen školanke jo äjak-se vot: openikad tuleskeleba meidennoks toimištoho, mö tuleskelem heidennoks. Om ani tärged kaita nenid kosketusid. Lapsile om voimuz tundištadas “Kipinä”-kulehtesenke, tedištada meiden rados, mastar’-klassoiš i m. e. Täl kerdal meid pakitihe tehta azjtego “Kalevala”-temale, i mö ihastusiš hökkähtim, sikš ku “Kipinän” arhivas om äi melentartuižid “Kalevalaha” sidotud materialoid. Mö pätim ühtenzoitta midä-se čomad i veslad minke-se tarbhaiženke — mastar’-klassan ühtenzoitim tedoidenke, starinoiči “Oma Media” -portalale Jana Filimonkova, üks’ vastusen tegijoišpäi.
Kaikuččel vodel “Kalevalan” marafonaks” Suomalaiž-ugrilaižen školan opendajad vaumištaba äi azjtegoid, mastar’-klassoid da viktorinoid, a mugažo kucuba adivoihe erazvuiččid rahvahiden keliden specialistoid i eskai Karjalan Valdkundan valdmehid.
Tarkištele "Oma Median" MAX-kanalad!
