Karjalan, šuomen ta vepšän kielien kurššit on lopetettu kieliresurssikeškukšešša. Viime vuuvven šykyšyštä tämän vuuvven kevyäh šuaten kurššilla opaššettih lukomah, kirjuttamah ta pakajamah kaikkie halukkahie.
— Joka uuši opaššušvuosi myö annamma ilmotukšie kielikurššien alkamisešta. Tämän opaššušvuuvven alušša šaima yli 120 opaštujua. Vuuvven lopukši joka ryhmäššä on noin 8—12 vakituista opaštujua, kumpaset käyväh joka tunnilla ta kumpasilla on tarkotuš — muistua omat juuret ta tietyä kantakanšojen kieltä tahi još hyö ollah ilman karjalaisie juurija ta tahotah opaštuo tašavallan kantakanšojen muamonkielie, šelitti karjalaisien, šuomelaisien ta vepšäläisien kieliresurssikeškukšen spesialisti Alina Kartinen.
Livvin, vienan ta lyydin karjalua šekä vepšän kieltä opaššutah kahešša ofline ryhmäššä: alku- ta jatkokurššilla. Opaštajina ollah Tatjana Baranova, Uljana Tikkanen, Marija Kočerina, Marija Šašina ta Galina Baburova. Niise on yksi online ryhmä Segežan opaštujien kera, šen opaštajana on Valerija Grafova. Šuomen kieltä opaššutah kolmešša ryhmäššä: ykši on makšutoin ta kakši makšullista. Yheššä lašettuna keškukšešša on 12 kieliryhmyä.
Joka ryhmäššä kurššin lopušša oli oma lopputehtävä: yhet šuoritettih tentti, toiset luajittih testi, kolmannet valmissettih luova tehtävä.
Enši opaššušvuotena kurššit jatkutah. Opaštajat vuotetah entisie ta uušie opaštujie.