Karjalan, vepšän ta šuomen kielien kilpailuh otettih ošua 139 koululaista Karjalan eri piirilöistä šekä Leningradin alovehelta. Kielikilpailu piettih 2. šulakuuta online-muuvvošša. Toimenpivon järještäjänä on Karjalan opaššuškehitykšen instituutti.
– Tänä vuotena ošanottajien miärä šuureni, šentäh kun kielikilpailu pitimä internetissä. Šen lisäkši tänä vuotena ei järješšetty kielikilpailuja koulun tašolla ta opaštajat iče voitih valita, ken ošallistuu tašavallan vaihteheh, šelitti Karjalan opaššuškehitykšen instituutin vararektori Jelena Bogdanova.
Koululaisien piti šuorittua kielitehtävie. 4.–5. opaššušvuosien lapšilla ehotettih kirjuttua šanašto- ta kielioppitehtävie šekä šuorittua harjotuš tekstin ymmärtämiseh. Yläluokkalaisien niise piti luatie kieliopillisie tehtävie šekä šuorittua kuunteluharjotuš. Šen lisäkši heijän piti kekšie ta kirjuttua pakauttelu Kalevala-eepossan šankarin kera.
Koulut, missä opaššetah muamonkielie, valmistauvutah kilpailuh etukäteh. Monen koulun opaštujat piäššäh voittajiksi muutoma vuori peräkkäh.
– Yli kymmentä vuotta meijän koulun lapšet piäššäh kielikilpailun voittajiksi. Nyt Kotkatjärven koulušša on yksi karjalan kielen tunti opaššušohjelman rajoissa ta vielä kakši lisäainehena, kerto Kotkatjärven koulun karjalan kielen opaštaja Ol’ga Nikitina.
Kielikilpailun kaikki ošanottajat šuahah ošanottajan tovissukšet, a voittajat šuahah lahjoja ta diplomija.