Karjalazien valattamine: 800-vuozipäivy – ruado menöy
Karjalan tazavallan piämies Artur Parfenčikov yhtyi istundon ruadoh Ven’an halličuksen varapiämiehen Dmitrii Černišenkon piän al. Paginal oldih pivot karjalazien valattamizen 800-vuozipäivän kunnivokse. Merkivuodessah on vie kaksi vuottu välii, karjalazien valattamizen 800–vuozipäiviä ruvetah pidämäh vuvvennu 2027.
Merkipäivän kunnivoittamizekse on kačottu kohendua da kunnostuttua kul’tuurualan objektua, luadie hengellizet opastuskeskukset, kehittiä infrastruktuurua raja-alovehil.
— Erähät pluanoih pandulois ruadolois on jo täytetty. Sordavalas on azetettu kniäzin Jaroslav Vsevolodovičan mustopačas, perustehellizesti kohendettih taidoškola Suojärves da kul’tuurutaloi Lahkolammis. Painettavakse on valmistettu histourien opastuskirju Karjalan školien 5.—7. kluasoin opastujile, kuduan kirjutettih Karjalan tiedomiehet. Opastuskirjas on kuvattu pravoslavnoin uskon histourii da sen juurdumine meijän mualoil. Jatketah Kaivospiälikön taloin kohendamistu Petroskois, kerdou Karjalan piämies omassah sivul VKontakte.
Paiči sidä Onieganjärven rannal histouriellizeh kohtah nostetah Pedrin da Puavilan časounu hyvyönluadijoin varoih. Oraskuus algavutah remonturuavot Kurkijoven kodirannankeskukses.
Pluanois on painatuttua pohjaismualoin obrazoin kogomus, luadie dokumentufil’mu pravoslavnoin uskon histouries Karjalas, valmistua ozuttelu, kuduas suau nähtä Kurkijoven pogostan XIII—XVIII vuozisualoin histouriedu.
Aihies voit lugie suomeksegi.
