Karjalas rodieu äijiä lämmembi
Tazavaldah vuotetah lämmiä siädy da tulipalovaravon tazon korrendamistu. Sih nähte oli paginua Karjalan luonnonrikkahuksien da ekolougien ministerstvan istundos.
Tazavallas on pandu merkile 27 meččytulipaluo 49, 6 gektuarua suurel alovehel, kai net on sammutettu tulen sytyttyy samannu piän. Nämmis tulipalolois 12 syy oli tulen muijal sytyndy — sähköliiniel, raudutiel, muatalovusmualoil da toizis kohtis. Tulipaloloin syylöi sellittäjes Karjalan luonnonrikkahuksien ministerstvu ruadau yhtes hädätiloin haldivon da syväinazieloin ministerstvan virrastoloin kel.
— Täl nedälil Rosgidrometeon tiedoloin mugah Karjalah vuotetah ilman lämbötilan nägeviä nouzuu da sen mugah tulipalovaravon tazon korrendamistu. Sendäh ielleh vagavah tarkastammo meččytulipalotilandehtu, sanoi Karjalan piämiehen lehtistöpalvelule Janina Svidskaja, Karjalan luonnonrikkahuksien da ekolougien ministru.
Endizelleh tarkua huomivuo kiinnitetäh profilaktiekkuruadoh. Meččien tarkastamizekse käytetäh dron-lendolaittehii, kuduat ostettih prezidentan kanzallizen projektan mugah. Kezäkuun allus Petroskoih tulou Geoskan-laitoksen spetsialistua, hyö pietäh praktiekku- da teouriiharjaituksii meččytalovuksien da Karjalan meččyvardoičuskeskuksen ruadajile. Kezäkuun 9. päiväs Sinergija-yliopiston tilois dronoi käyttämäh rubieu opastumah lähes 120 ruadajua.
Yhty Oman Median kanualah MAX:as!
