Karjalan tuottehien myöndy kazvau Internetangi vuoh
Rossija-keskukses algavui kanzoinväline eksportufourumu ”Luajittu Ven’al”. Suureh pidoh tuli biznessu- da valdivomiesty, suurien tevolližuslaitoksien edustajua, ulgomualastu partn’ourua. Paginal oli Ven’an tavaroin viendän suurendamine.
— Karjalal on 60 partn’ourumuadu. Tärgevimät ollah Kitai, Indii da Turtsii. Meijälpäi viettävät tavarat ollah puu da tsel’l’ulouzu-bumuagahizet da einehtavarat. Tämän vuvven enzimäzes puoliškos Karjalan tazavallaspäi eksport’ourua oli 159, kirjutti ekonoumiekan kyzymyksis vastai Karjalan premjer-ministru Ol’eg Jermolajev VKontaktas.
Fouruman aigah oli paginua meijän muan tavaroin eistämizes sähköhizien kauppupaikoin vuoh.
— Vuvvennu 2023 Internettu-torrun yhtehine torruntäydehys Karjalan tazavallas oli 12, 4 miljardua rubl’ua, se on kazvanuh 1, 3 kerdah mennyön vuvven samah aiguvälih verraten. Internetan kauti myöndy Karjalan tazavallas jälgimäzen viijen vuvven aigah on kazvanuh 4, 4 kerdah: 1, 4% vuvvennu 2020 da 6, 2% vuvvennu 2024. Karjalazien valmistajien tuottehii löydyy Ven’an marketplace-platformoil, kirjutti Jermolajev.
Vuvvennu 2024 Ozon-marketplace pani rattahile uvven tuottehien ozuttelun ”Luajittu Karjalas”. Paikallizet tuottehien valmistajat voijah sijoittua omat tavarat sih ozutteluh da suaja ližiä eistämisty niilöin myöndäkse.
