Karjalan Rahvahan Liiton projektu: viesti kodoimualpäi
Karjalan Rahvahan Liiton vuvvennu 2024 algavunnuon da tänäpäi jatkujan projektan hantuzis lapset valmistettih hyvittelykartočkat, kuduat suatetah erillizeh voinuoperatsieh yhtynyzile. Projektan tarkoituksennu on säilyttiä karjalazien kieldy da kul’tuurua, levittiä tiedoloi Ižänmuallizes voinas da säilyttiä mustuo sen tapahtumis.
— Projektan matkoih otimmo kerale lapsii da nuorii. Heil oli mahto kirjuttua hyvittelykartočkat Voiton päiväkse erillizeh voinuoperatsieh yhtynyzile. Net kartočkat työnämmö sinne, kus nygöi pietäh bojuloi. Uskommo, ku sie olijat hyväl mielel suajah viesti kodoimualpäi. Hyvittelykartočkat vedäy Valerii Lazarev, Karjalan Yhteiskunnallizeh paluattah kuului, sanoi Oma Mediale Karjalan Rahvahan Liiton piälikkö Anna Jakovleva.
Karjal ristikanzois: histourii, kieli, kul’tuuru -projektan mugah liittolazet käydih Pitkährandah, Anuksen piirin Alavozeh, Priäžän piirin Jessoilah, Segeežah da Karhumägeh. Joukkoh kuuluttih 12—16-vuodehizet lapset da nuoret, kuduat tiijustettih projektan pidolois Ižänmuallizen voinah suurimis tapahtumis, Karjalan eläjis, kuduat suadih korgiet Nevvostoliiton urhoi - da Ven’an urhoi -kunnivonimet. Yhtes ”Oman Pajon” horalazien kel lapset pajatettih ”Kat’ušua” da”Voiton päivy” karjalakse. Lapset opastuttih kirjuttamah hyvittelykartočkoi Voiton päiväkse karjalakse libo karjalankieliizii sanoi da virkehii käyttäjes. Projektan Karel’skii patriotičeskii desant -pidoh yhtyi lähes 200 hengie.
