Karjalan rahvahaližes teatras mäneb runoliž-muzikaline “Kalevala: Kuvastuz” -ezituz
Rahvahiden ühtmuden voden aigan Karjalan Valdkundan rahvahaližen teatran Surel laval ozutadas “Kalevala: Kuvastuz” -ezituz. Azjtego mäneb 24. uhokud 19:00 časud. Siš tedotadas Karjalan kul’turministerstvan oficialižel VKontakte-lehtpolel.
“Kalevala: Kuvastuz” -ezitusen programmas pähomaičuz anttas nelläle hengele, kudambiden elo-ozad da tabad oma äjiden s’užetoiden pohjal: vanh i melev Väinämöinen, nor’ i tragine Aino, mahtokaz Ilmarinen-sep da Pohjolan vägekaz emäg Louhi. Kaikutte heišpäi om ičeladuine ristit ičeze tahtoidenke, vägestusidenke da bedoidenke — i ezituz ozutab necidä unikaližut.
— “Kalevala: Kuvastuz” kucub pagižmaha männuden aiganke, ecmaha ičeze “kuvastusid” vanhoiš starinoiš. Karjalan Rahvahaližiden muzikvändimiden orkestr da Rahvahaližen teatran artistoiden ühthižrad andab kaikuččele kacujale voimusen kundelta epižid hengid, rižada heiden himod, melevut, kibud da ihastust, a mugažo löuta ičeze kuvastusen neniš igähižiš hengiš, sanutas Karjalan kul’turministerstvas.
Azjtegon tegijad oma Rahvahaližen sädandradon da kul’turiniciativoiden keskuz da Karjalan rahvahaline teatr.
Uzišt neciš temas voib lugeda mugažo suomeks.
Tarkištele "Oma Median" Telegram-kanalad!
