Karjalan piämieš vuati korottua šairalatutkimukšen vauhtie
Karjalan tašavallan halličukšen issunnošša käsiteltih muun muašša väještön šuojelutarkaššukšien viettämistä. Artur Parfenčikov korošti aihien šuurta merkityštä, kertou Karjalan tašavallan piämiehen lehistöpalvelu.
— Nykyjäh meijän eläjien tervehyš on etupaikalla valtijolla, ta šairalatutkimuš auttau šäilyttyä šitä šekä vaššata vakavien tautien kehityštä, šano alovehen piämieš.
Täh aikah šairalatutkimukšen šuunnitelmista on toteutettu vain 40%. Alovehen piämiehen mukah še tarkottau, jotta sistemi ei ole šopiva eläjillä.
Issunnošša Karjalan piämieš käški turvuamah 70% kanšalaisien šairalatutkimukšista šyyškuun 1. päiväkši.
— Meilä on esimerkit šiitä, mitein pitäy ruatua. Louhen, Segežan, Karhumäjen ta Kalevalan piirit pärjätäh kunnollisešti. Passipo kollegoilla vaštuušta, kirjutti Artur Parfenčikov poštaukšeššah Vkontaktešša. — On niitä piirijä, kumpasien pitäy muuttua omua ruatuo. Tänäpiänä halličukšen issunnošša annoin tehtäväkši helpottua šairatutkimušta. Še on piäliäkärien ta piirien johtajien velvollisuš. Alovehen tervehyšhoitoministerijö niise vaštuau šiitä. Šielä, missä šyyškuun 1. päiväkši ei ole dinamiikkua, tulou kurinalani vaikutuš.
Šairalatutkimuš on Pitkä ta aktiivini elämä -kanšallisprojektin tärkeimpie tilaisukšie. Projekti auttau Venäjän eläjie tarkaštua omua tervehyttä.
Yhty Oman Median MAX-kanalah!
