Karjalan nuorien ruavos saneltih Čel’abinskas
Čel’abinskan alovehen haldivos oli ezitetty Karjalan nuorien kanzallizien projektoin ruadokogemus. Sie oli pietty Ven’an suomelas-ugrilazien rahvahien assotsiatsien prezidiuman istundo.
Pidoh tulluot saneltih omas ruavos, tulokkahien projektoin todevuttamizes. Anna Anhimova kerdoi vuvven 2024 projektas ”FUMM. Suomelas-ugrilazien nuorien maršruutat”, kudai oli todevutettu Karjalan tazavallan piämiehen grantufondan kannatuksel.
Projektan tarkoitus oli kuččuo nuorižuo suomelas-ugrilazeh ymbäristöh, ku hyö voidas luadie omii projektoi. Eräs tärgei projektan tapahtumu oli Kižin suarel mennyt vuvven kezäl. Suarele kerävyi karjalastu, vepsälästy, komi-permilästy, marilastu da hantua. Joga päiviä nuorile saneltih Karjalan kandurahvahien perindölöis, arhitektuuras da kul’tuuras.
— Minä ylen hyväl mieles sanelin meijän erinomazes projektas. Vastah pidoh tulluot sanottih ylen hyviä kannatussanua da korgiesti arvostettih meijän ruado. Paginas kuului kehoitustu luadie moizii projektoi meijän muan toizil alovehil, sanoi Anna Anhimova Kanzallizen da alovehellizen poliitiekan ministerstvan lehtistöpalvelule.
Ruadovastavuksil Čel’abinskas prezidiumah kuulujat šeikuittih Marin tazavallas varustettavii suomelas-ugrilazien suurii pidoloi.
— Myö saimmo kuulta toizis pättävis ruadokeinolois da tavois, midä ruatah yhteiskunnallizet liitot da aktivistat Ven’an alovehil, ližäi Anna Anhimova.
