Karjalan kieli Yandex:as
Uvvennu pruazniekannu Ven’an kanzoin kielien päivänny 8. syvyskuudu Yandex-kiändäi rubei käyttämäh karjalan kieldygi. Yandex:an käyttäjät, kaikin, kel on tarvehtu da himuo, nygöi voijah kiändiä sen vuoh karjalankielizii tekstoi muailman kymmenile kielele da järilleh.
— Se on tiedomiehien, opastajien, žurnalistoin da volont’ouroin suuren yhtehizen ruavon tulos. Sovitus on vaste vai pandu alguh, sendäh rubiemmo keriämäh sen arvosteluloi da parandamah sen ruavon luaduu, sanoi Karjalan piämies Artur Parfenčikov omassah lehtistöpalvelule.
Suuri ruado on pietty Kanzallizen da alovehellizen poliitiekan ministerstvan piän al, kudai yhtisti Karjalan tiedokeskuksen Kielen, literatuuran da histourien instituutan, Karjalan piämiehen tyves toimijan termistökomiisien, yhteiskunnallizien liittoloin da volont’ouroin ruadoväit.
Neiroverkon opastamizekse oli luajittu tekstoin korpussu kahtel kielel — karjalakse da ven’akse. Tekstoin joukos oli karjalan kielele kiännettyy kirjalližustevostu, internet-entsiklopeediedu, kanzalliskielizien julgavoloin tekstoi da erillisty resursua: VepKar-kielikorpussu da multimediasanakirju LiPaS.
Suuren panoksen täh ruadoh on luajittu Oma Mua -lehten toimittajat da lehteh kirjuttajat, karjalan kielen opastajat da omal himol ruadajat.
Karjalankielisty Yandex-kiändäjiä ruadoh pannes on käytetty enämbi 86 000 virkehty karjalan da ven’an kielel da läs 100 000 virkehty ilmai kiännösty kontekstan levendämizekse da kiännöksen parandamizekse.
Karjalan kielen Yandex:an palveluh juuroittamine on tärgei askel karjalan kielen säilyttämizes da kehittämizes nygözis ololois. Tänäpäi Yandex-kiändäi ruadau Ven’an kanzoin enämbäl migu 20 kielel. Karjalan kieli on enzimäine Karjalan kandukanzoin kielis, kudual ruadau Yandex-kiändäi.
Projektu on todevutettu Kanzalližuksien azieloin federuallizen agenstvan da “Ven’an kanzoin koin” kannatuksel da Piiteris pietyn ekonoumiellizen fouruman aigah Karjalan haldivon da Yandex:an välil solmitun sobimuksen mugah.
Aihies voit lugie suomekse da ven'aksegi.
Yhty Oman Median kanualah MAX:as!
