Karjalan kanšallini musejo šai uuvven partn’orin
150-juhlavuotena Karjalan tašavallan kanšallini musejo šai uuvven partn’orin. Oli allakirjutettu šopimuš yhteisruavošta Venäjän etnografisen musejon kera.
Šitä ennein musejon spesialistit jo monie vuošie toteutettih yhtehisie projektija, käytih toini toisen luokše konferenššiloih. Uuši šopimuš auttau šuurentua mahollisukšien miäryä.
– Enšimmäisenä šuurena toimenpitona on Venäjän pohjosen vanhauškoisuolla omissetun näyttelyn järještämini. Šitä voipi esittyä eri paikoissa. Näyttelyn valmistuas’s’a šuau luatie äijän uušie löytökšie. Toivon, jotta yhtehisen ruavon aikana avaukšie tulou vielä enemmän, korošti Etnografisen musejon Venäjän luoteisošan ta Itämeren rannikon kanšojen etnografijan ošašton johtaja Ol’ga Fišman.
– Tämä asiepaperi tuou täšmennyštä ta kurie meijän toimintah. Myö šamoin toivomma, jotta yheššä ruamma äijän ta še tuou vain hyötyö, lisäši Kanšallisen musejon johtaja Mihail Gol’denberg.
Tänä vuotena Venäjän luoteisošan yksi šuurimmista musejolaitokšista täytti 150 vuotta. Juhlavuotena musejošša pietäh äijän tilaisukšie, ykši niistä on šuuri kanšainvälini tietokonferenšši, kumpasešša keškuššellah pohjosien musejojen ruavošta.
