Karjalan piämieš Artur Parfenčikov tašavallan kulttuuriministerin kera käytih Lahenpohjan piirissä, Kurkijoven pos’olkašša. Šielä vuuvvekši 2027 pietäh kotišeutukeškukšen korjaušta, jotta järještyä Karjalašša mierolaisuon levittämisellä omissettu näyttely. Kurkijovešša on mierolaini kulttuuri-opaššuškeškuš, šitäki uuvvissetah merkkipäiväkši.
Šen lisäkši karjalaisien rissinnän 800-vuotisjuhlan rajoissa pos’olkašša rakennetah instalatijo — kallivošelällä noššetah merkinantolyhtyjen sistemie, kummaista käytettih keškiaikoina.
Vielä Priozerzkin tien viereššä rakennetah Pyhän ruhtinahan Jaroslav Vsevolodovičin časoun’a.
— Kurkijoki on ammuisista ajoista tunnettu paikka. Šielä oli kauppamatkojen ristevyš. Näistä maista aina taisseltih ta raja šiirrettih muutoma kerta. Konša karjalaisie rissittih tiälä oli mierolaisie kirikköjä, konša raja oli siirretty ne oli tuhottu ta rakennettu katolini kirkko, ka šeki oli tuhottu, kerto kulttuuriministeri Aleksei Lesonen.
Kurkkijovešša pietäh huomattavan ošan merkkivuuvven ohjelman tapahtumista. Vuuvvekši 2027 pos’olka niise muuttuu, šielä pietäh kunnoštamisruatoja.
— Kurkijoki tulou yhekši juhlimisen keškukšista. Šentäh istorijallisien paikkojen lisäkši pitäy luatie kaikki, mitä on mahollista, jotta pos’olka tulis mukavammakši elämäkši ta vierailukši, lisäsi Artur Parfenčikov.
Käšyn karjalaisien rissinnän 800-vuotisjuhlan pitämiseštä vuotena 2027 allakirjutti Venäjän presidentti. Šen viettämisen rajoissa Karjalašša avatah henkillisopaššuškeškukšet, restauroijah kulttuuriperinnön muistomerkkijä, toteuvutah kuštantamisprojektija, pietäh erilaisie tilaisukšie.