Karjalah on avautun Presidentin kulttuurialottehien šiätijön projektitoimisto

Projektitoimiston avajaisih ošallissuttih Presidentin kulttuurialottehien šiätijön varapiäjohtaja Jevgenii Murahveri. Kuva: Karjalan tašavallan piämiehen lehistöpalvelu

Presidentin kulttuurialottehien šiätijön projektitoimisto alko omua toimintua Petroskoissa. Laitoš rupieu auttamah projektin luatijie šuaha granttitukie omien idejojen toteuttamiseh, ilmottau Karjalan tašavallan kulttuuriministerijö.

— Projektitoimistojen anšijošta opaššuš alovehilla helpottuu, vet paikoilla on pätövät spesialistit, kumpaset šiännöllisešti vietetäh opaššuštilaisukšie šekä voijah neuvuo idividualisešti. Meijän tehtävänä on ruatua näin, jotta idejoja ei šiirrettäis myöhäsempäh aikah. Luovan idejan joka luatijalla pitäy olla mahollisuš kohentua omua projektie ta löytyä partn’orien tukie, lainuau ministerijö Presidentin kulttuurialottehien šiätijön varapiäjohtajan Jevgenii Murahverin šanoja.

Karjala aktiivisešti ošallistuu Presidentin kulttuurialottehien šiätijön granttikilpailuih. Männyön 15 kilpailun aikana alovehelta työnnettih 850 anomušta. Niistä 138 projektie šai 250 miljonin rupl’an tuven. Šamah aikah yhteisrahotukšen miärä oli yli 357 miljonie rupl’ua.

Viiješšä vuuvvešša Presidentin kulttuurialottehien šiätijö kannatti Karjalan muutoman tärkien projektin. Niijen luvušša on “Muisson šyvyš. Belomorskin bunkkerit”, “Karjalaisen antilahan prituanie”, “Šiun lähetyš”, “Kulttuurien dialogit – yštävyön šillat” ta muut.

Projektitoimisto šijottuu atressilla Leninin aukivo, 2.

Aihiešta voit lukie niise šuomekši ta vepšäkši.

Yhty Oman Median Telegram-kanalah!