Tradicijan mödhe Karjalan valdkundan eläjil om voimuz kodvda ičeze kelen mahtoid da kirjutaba diktantan vepsän da karjalan kelel. Täl vodel akcii zavodiše 20. päiväl sulakud Petroskoiš. Tahtnikad voiba kirjutada diktantan ei vaiše Petroskoiš. Änižräunan, Suojärvin, Kostomukšan, Louhin, Kalevalan da toižiden agjoiden eläjad voiba kirjutada sen kodikelel.
— Änižröunan vepsläižed voiba kirjutada diktantan ičeze küläs-ki: Kalages, Šoutjärves da Šokšus. Šoutjärves ristitud voiba kirjutada nel’l’ päiväd 20.-23.sulakud, 15.00, külän školas. Kalages diktant mäneb 23.sulakud, 15.00, Kalagen školas. Šokšus se planuitas 20.sulakud, 10.00, Šokšun školas. Tekstad vepsän kelel vaumičeb Maria Košeleva, sanub Aleksandra Anufrijeva, Rahvahaližen da regionaližen politikan ministerstvan radnik.
Akcii omištadas Vepsän da karjalan kirjkelen päiväle. Sen tegijad oma Rahvahaližen da regionaližen politikan ministerstv da ”Periodika”-paindišt.