Karjala sab miljardoid kehitoitandprogrammaha
Karjalan valdkund saškandeb joga voden 2024. vodehesai miljardan rubl’ad federaližen b’udžetaspäi socialižen da ekonomižen programman mödhe. Ezmäine miljard anttas heinkus. Siš pagištihe Venäman ekonomikan ministerstvan da Karjalan, Altain da Tivan valdkundoiden pämehiden suimal proidnudel nedalil.
Karjalan socialine da ekonomine programm tugedab maradoiden, matkustamižen da transportan kehitoitandad, eländpertiden da sportkeskusiden sauvondad da uziden radsijoiden avaidamišt. Mugažo kohetas Belomorskan kal’l’pirdatused-kompleksoid, saudas uzid töpajoid Petroskoin tegeližparkas da tehtas tal’vsportroduiden klaster.
Programman abul Karjalas tahtoidas avaita enamba 1700 ut radsijad. Valdkundan kahitoitandaha anttas enamba 10 miljardad rubl’ad.
Karjalan, Altain da Tivan valdkundoiden socialižiden da ekonomižiden programmoiden satusiden mödhe niiden radaig voib jatktas 2027. vodehesai da rahoituz voib kazda videhe miljardad rubl’ahasai.
