Karjala liitty Muailman Venäläiseh Rahvahankokoukšeh
Pimiekuun 17. päivänä Petroskoin pyhittäjä Aleksanteri Syväriläisillä nimitetyššä pravoslavnoissa henkellisyš- ta šivissyškeškukšešša avattih Muailman Venäläisen Rahvahankokoukšen Karjalan alovehellini ošašto.
— Enšimmäini Muailman Venäläini Rahvahankokouš mäni vuotena 1993, a vuotena 1995 järještö virallisešti rekisteröitih Venäjän oikeušministerijöššä. Kokoukšen jäšeninä voijah olla kanšalaisjärještöt ta yksityishenkilöt. Kokoukšen struktuurih kuulutah paikalliset ta alovehelliset ošaštot. Korkein hallintoelin on Kokoukšen kerähmö. Kokoukšen piämiehenä on Moskovan ta koko Venäjän patriarhi, šelitti Petroskoin ta Karjalan mitropolitta Konstantin.
— Karjala on erikoini paikka venäläisellä henkellisyöllä ta pravoslavnoilla ušolla. Meijän ušiet kantatuatot ruattih henkellisie urošruatoja. Pohjosen ankarissa oloissa tavottih venäläistä, pravoslavnoita henkie. Vuosišatojen aikana meijän kantatuatot jouvuttih puoluštamah omua oikevutta elämäh ta uškoh. Meijän pitäy myöštyö omih arvoloih ta perintehih. Še auttau meitä kaččuo tulovaisuoh, korošti Karjalan tašavalln piämieš Artur Parfenčikov.
Karjalan ošašton hallinnon jäšeniksi valittih mitropolitta Konstantin, Artur Parfenčikov, Venäjän duuman deputatti Valentina Pivnenko, Karjalan lakienluajintakokoukšen johtaja Elissan Šandalovič, Petragranit-yritykšen johtaja Dmitrii Fabrikantov ta pyhä Panteleimonilla nimitetyn kirikön piäpappi Vadim Antipin.
