Koncertan aigan scenal paiči jubil’arad ezineba toižed-ki kollektivad, kudambad kosketasoiš ”Karjalanke” – ”Vesläžed”, fol’kl’orišt-etnografine ansambl’ ”Kiži”, fol’kl’orine teatr ”Karel’skaja gornica”, Karjalan tamožn’an kollektiv ”Karjalan rahvas”, tätüteatr ”Čičiliušku” da toižed.
– Nügud’ mö vaumičem programmad. Scenal ozutam karguid, miččid harvoin kargaidam. A koncertan jäl’ghe tegem interaktivan – teatran ezizalas kargaidaškandem ühtes kacujidenke, miše heile ei pidaiži pit’kha ištta ühtel sijal, sanub ”Karjala”-ansambl’an ohjandai Andrei Anisimov.
”Karjala” om äiluguiden kaikenvenäman da erazvuiččiden maiden festivaliden laureat da konkursoiden vägestai. Ansambl’ paksus tehleb interaktivižid programmoid kacujile, kudambad iče tegesoiš niiden ühtnikoikš. ”Karjala” tegeb aktivišt radod Karjalan kul’turan elos. Ozutesikš, nügüd’ ansambl’ om kahten projektan ühtnik: ”Dvorovii etiket”-videorolikad Karjalan tradicionaližes sädos da ”Hienoja tansseja” – 20.-30.-voziden karguiš.