Koulun rakentamisešta vaštuau Karelstroimehanizatsija-rakennušyrityš. Kontraktin summa on 1,6 miljardie rupl’ua. Objekti on rakennettava vuuvven 2023 talvikuukši. Urakoiččija kerkisi purkua vanhan 2. koulun, ašettua rakennušleirin.
Rakentamisen ajakši 2. koulun opaštujie työnnetäh Karhumäjen 3. yleisšivistäjäh laitokšeh ta paikalliseh taitokouluh. Väliaikasien lisätyöpaikkojen järještämisellä kahešša koulušša viranomaiset kulutettih 5,5 milljonie rupl’ua.
Elokuun 11. päivänä Karjalan tašavallan piämieš Artur Parfenčikov kävi rakennušpaikalla.
– Iče rakennuš on šuunniteltu kaikkien nykyaikasien teknologijien mukah. Še on vällä ta valosa. Lisäkši uuvven koulun alovehella on stadioni juokšuteineh, kenttie liikkumista vuatijie pelijä, lentopalluo, koripalluo ta lepuo varoin, kirjutti Artur Parfenčikov omalla VK-šivulla.
Tašavallan piämiehellä kerrottih, jotta uuvvella koululla jiäy Neuvoštoliiton šankarin Aleksandr Fan’aginin nimi.