KareliaSkiFest-talvifestivali piettih Petroskoissa 7. kertah. Karjalan šuurin hiihtotapahtuma on šamoin ni Venäjän yksi šuuremmista hiihtomarafonista. Šitä pietäh Urheilu on elämän normi -projektin rajoissa.
Marafonin lisäkši festivalin rajoissa pietäh kilpailuja polkupyöräilijien ta koiraval’l’akkourheilijien kešen. Festivali keštäy netälin ta yhistäy yli 1500 ihmistä Venäjän eri puolilta.
Šuuret avajaiset piettih 11. kevätkuuta. Enšimmäisinä kilpailtih pienimmät urheilijat, kumpaset hiihettih 500 metrie ta kolme kilometrie. Šiitä tykin ampumisella annettih startti 50:n, 25:n ta 10:n kilometrin marafoniloilla.
Urheilukilpailujen festivalista tuli talvipruasniekka koko perehellä. Starttipaikalla piettih leikkijä, huvitukšie, kilpailuja lapšilla ta aikuhisilla.
50:n kilometrin marafonin voittajiksi piäštih Kirill Gužijev ta Marija Novos’olova, 25:n kilometrin marafonissa voitettih F’odor Čepik ta Natalja Fofanova, a 10:n kilometrin kilpailušša nopeimpina oltih Jevgenii Pečorin ta Anastasija Ribakova.
Festivalin toisena päivänä piettih ekstremalini hiihto Kiži SKI X-RACE — še on 72 kilometrie Kižin šuarelta Petroskoih Onegan jiätä myöten.
— Tänä vuotena marafoni tovellah oli ekstremalisena. Šentäh kun oli kova tuuli, tuisku ta äijän lunta sel’l’alla. Šiitä huolimatta 52 urheilijua tuli starttih ta viimeset niistä lopetettih marafoni iltahämäräššä, mi niise lisäsi vaikeukšie, šelitettih marafonin järještäjät.
Kiži SKI X-RACE -marafonin voitti Aleksei Uvarov.
Kevätkuun 16. päivänä pietäh yöhiihtokilpailu ta polkupyöräilijien talviajot. Festivali loppuu niise marafonilla. A kevätkuun 18. päivänä hiihtäjät kilpaillah klassisešša tyylissä 50:n, 25:n ta 10:n kilometrin marafonissa.
Tänä vuotena Periodika-kuštantamo oli festivalin partn’orina. Kilpailujen järještäjät piettih internettikilpailu, kumpasen voittaja šai Pedri, kuulužu kuningas -kirjan. Festivalin aikana šai oštua kuštantamon kirjoja, a festivalin piäuutisie voipi lukie kuštantamon lehtilöissä ta Oma Media -portalissa.