Kandukanzoile kehoitetah ližiä tugie
Karjalan Zakonoinhyväksyndykerähmön vitse-spiker Ol’ga Šmajenik Salehardan linnas Parlamentarieloin vuoropagin -fourumas vepsäläzien kannattamizes kerdojes kehoitti suurendua federuallistu kannatustu vähembistökandukanzoile. Vuvves 2024 sen kannatuksen suurus pienenöy. Sendäh Šmajenik kehoittigi suurendua se vuvven 2023 tazoh suate.
— Eri huomivuo parlamentarii kiinnitti vepsäläzien alovehien kul’tuuran, kielen da sotsio-ekonoumiellizeh kehitykseh da perindöllizen elostavan kannattamizeh. Ol’ga Šmajenik vihjai, ku Karjal suau federuallizes b’udžietaspäi yhtehizen subsiidien, kuduas vuitti menöy vepsäläzien ekonoumiellizeh da sotsiuallizeh kehittämizeh. Jälgimäzien viijen vuvven aigah sen suurus oli 15, 7 miljounua rubl’ua, ilmoittau Zakonoinhyväksyndykerähmö omassah VK-sivul.
Niilöih varoih kui ilmoittau Zakonoinhyväksyndykerähmön lehtistöpalvelu luajitah etnopuustot, kannatetah vepsäläzien kylien seuroin perindöllisty talovuttu, azetetah kaksikielizii tieviittehii, pietäh vepsän kielen kursiloi ruavahih niškoi. Joga vuottu pietäh perindöllizii vepsäläzii pruazniekkoi ”Elonpu”, ”Kalarand” da ”Päiväine”.
Karjalan tazavallas eläjis kanzois vaigu vepsäläzet kuulutah Pohjazen, Siberin da Loittozen päivännouzupuolen kanduvähembistölöih. Vepsäläzet eletäh perindöllizil alovehil — Onieganrannikon piirin kolmes kyläs — Kalages, Šoltarves da Šokšus. Vuvven 2021 rahvahanlugemizen tiedoloin mugah heidy on 2471 hengie.
Aihies voit lugie vepsäksegi.
Yhty Oman Median kanualah MAX:as!
