Vepsän kul’tursebran “Kel’ – minun Kodima”-projektan abul Kalages zavodi rata taidehstudii, a mugažo käzitön studii. Openduzčasuiden aigan kulub čoma vepsän kel’, ühtnikoil om voimuz tedištada da opeta uzid sanoid vepsän kelel, a mugažo tundištadas ezitatoiden tradicijoidenke da veroidenke.
Taidehstudii radab Kalagen školas kerdan nedališ. Pirdandurokoid lapsile andab lapsiden kazvatai Maria Gorškova Toižegespäi. Hän starinoičeb pirdatusen sändoiš i opendab heid pirdmaha erazvuiččiš tehnikoiš.
— Lap’aigas kävelin taidehškolha, möhemba olen lopnu äi pirdandkursid. Nügüd’ ičeze tedoid andan lapsile. Mugažo urokoiden aigan mö opendam lapsidenke uzid sanoid vepsän kelel, sanub Maria Gorškova.
Kalagen ”Värtin”-etnokeskuses jatketas vedäda vepsän kelen kursad. Niid vedäb vepsän kelen tundii Ol’ga Mironova. Necišpäi vodespäi sigi-žo zavodi rata käzitön studii.
— Necil vodel kerdan nedališ mö zavodim kudoda, ken mida voib. Toine toižespäi opendamiiš, kelle-se offot om kudoda niskiid da alaižid, ken-se tegeb hozjid. Meletan, zavodim hivin mänetada aigad, voib olda, i lapsed tuldaze i zavottaze miidike mida-se tehta, sanub Ol’ga Mironova.
Johtutam, kaik nened azjad tehtas “Kel’ – minun Kodima”-projektan aigan, mitte sai Karjalan pämehen grantan.