Kaivospiälikön taloin kohendusruavot jatkutah vuvvennu 2026
Petroskoin linnas Fridrih Engel’san pihal olijan Kaivospiälikön taloin kohendusruadoloi piettih vuozinnu 2019—2021. Sit kohendusruavot keskustettih, objektu konserviiruittih.
Tänä vuon net uvvessah pandih rattahile.
— Petroskoih da Karjalah tulijoile turistoile Kaivospiälikön taloi olis mieldykiinnittäi kohtu, ku se on Petroskoin vahnimii rakenduksii, kudai on nostettu 1700-luvun lopus. Charles Gascoigne, šotlandielaine da ven’alaine oružoin luadii, metallumies, inženieru da keksii, sežo on mieldykiinnittäi persounu. Hänen piän al ruadoi Petroskoin Aleksandran puuškienzavodu vuozinnu 1786—1806, sanoi Oma Mediale ekskursieloin pidäi Marina Ošojeva.
Kaivospiälikön taloin kohendamisruadoloih annettih varua federuallizes da tazavallan b’udžietaspäi. Ruadoloi pidäy silmäl ”Kul’tuuruperindön objektoin kaiččemizen keskus”.
— Linnan vahnimien rakenduksien joukkoh kuulujan taloin kohendamine on tiettäväine vaigei da vuadii ruado. Myö äijäl uskommo histouriellistu kodii kohendajien laitoksien korgieh ruadoneroh da uskommo, ku remontan jälles Kaivospiälikön talois rodieu Petroskoin tärgei kul’tuurukeskus, se rubieu vedämäh omah puoleh Karjalan eläjii da meijän tazavaldah käyjii, sanoi Karjalan piämiehen lehtistöpalvelule Kul’tuuruperindön objektoin kaiččemizen keskuksen piälikkö Marina Osijeva.
Aihies voit lugie suomeksegi.
Yhty Oman Median kanualah Telegramas!
