Köynäš-košen viereššä ašetettih tiijotuštaulu
Kešäkuun 19. päivänä Myö karjalaiset -projektin rajoissa Viena-šeuran šekä Arhippa Perttusen šiätijön jäšenet, kumpasie autettih kaikki halukkahat Koštamukšešta ta Vuokkiniemeštä, ašetettih tiijotuštaulu juuri Köynäš-košen viereššä. Šiitä šuau lukie košen ta lähipaikkojen istorijašta venäjäkši ta karjalakši.
– Kaunehen ta šuuren puulauvan luati Vuokkiniemen muasteri Aleksandr Lesonen. Taulun yläošašša on erikoisie šuojeluešinehie, kumpaset varmašti šuojellah iče tietotauluo ta paikkuaki pahanluatijista, šelitti Viena-šeuran jäšen Aleksandra Lesonen.
Perintehellisešti Köynäš-košella järješšetyllä toimenpivolla oli omissettu urheilutapahtuma – kahekšankilometrini juokšu Vuokkiniemen kyläštä Köynähällä. Kilpailuh otettih ošua juoksijat Koštamukšešta. Juokšun lopušša urheilijilla myönnettih käsin luajittuja puisie mitalie ta tovissukšie juokšuh ošallistumisešta.
Kilpailun jälkeh urheilijat kuunneltih kotišeutututkijan Valentina Dmitrijevan valmistamua ta lukomua mukavua luventuo Čenan kyläštä. Šiitä keräytynyitä ilahutettih Kataja-ryhmän esittämät laulut karjalan kielellä. Toimenpivon lopušša kaikin maisseltih makieta kalakeittuo ta heinäčäijyö.
Köynäš-koški šijoutuu kuuvvešša kilometrissä Vuokkiniemen kyläštä Latvajärven šuuntah.
