Käsityömuasterit keräyvyttih naispiirih
Joka šykyšy kolmaš vuosi peräkkäh Tverin Karielan kodi -järješšön jäšen Tatjana Žil’tsova keryäy naisie naispiirih luatimah käsitöitä, tuttavuštumah karjalaiseh kulttuurih, käymäh kylyh ta levähtelömäh.
— Käsityötä ruatamašša naiset voijah paremmin tuntie omua ičettä. Niise tiälä myö voimma levähtyä kaupunkiloista, šeuruššella, käyvä kylyššä. Ennein mie ičen pitin kaikkie muasteri-oppija, a tänä vuotena toiset muasterit oli kučuttu, šano käsityömuasteri Tatjana Žil’tsova.
Toimenpito kešti kolme päivyä ta šen aikana šai opaštuo äijyä mukavua. Natalja Safarova opašti luatimah kaunehie kampaukšie kaššie plettimällä, Ivan Petuškov esitti puušeppäpajua ta vietti šielä muasteri-opin, Jelena Plato opašti kutomah rannehkoruja kankašpuilla ta lautasilla, Aljona Vorontsova piti alušpaijan ompelutunnin, Tatjana Žil’tsova opašti kutomah vöitä ta kešryämäh, Natalja Požarskajan kera kaikin kokitettih, a Jaroslav Jevgrafov opašti paistamah kalittoja.
Naispiiri kešti kolme päivyä ta yhisti karjalaisešša koissa 12 henkie. Vierahat tultih piäošin Moskovašta.
