“Hypеrbolaini” vienakši esitetäh tänäpiänä
Karjalaisien runojen juonet Lemminkäiseštä, hänen muamošta ta pereheštä šekä karjalaiset legendat ta tarinat innoššettih ohjuaja Jegor Černišov ta käsikirjuttaja-dramaturgi Anastasija Bukrejeva valmistua spektakli nykyaikasista ta rahvahalla ominaisista ihmisšuhtehien proplemoista.
— Hyperbolaini-spektaklissa piähahmot ei olla enyä väkövät šankarit eikä heilä ole erinomaista taikavoimua, vain hyö ollah tavalliset ihmiset omine tavallisine intoloineh, šanottih spektaklin valmistajat.
Näytelmän piäšankari Lemminkäini, kummaista šamoinki kučutah Ahtiksi ta Hyperbolaisekši lähtöy mutkikkahah pitkäh matkah, kumpani on täyši kuot’t’elukšie, käršimykšie ta virheitä. Matan tarkotukšena ei ole muailman pelaštamini vain oman ičen šekä elämän tarkotukšen eččimini. Matašša jumalat ei enyä auteta lieto Lemminkäistä, ka tovellini miešyštävyš ta pereh ollah tukena vaikeissa hetkilöissä.
Karjalaisie runoja, kumpaset ollah spektaklin pohjana esittäy moni-iänini kuoro. Laulut ta musiikki lisätäh henkenhapatukšie ta värissytäh kaččojua šamoin kuin tanššit ta valolaittehien käyttö.
Koko spektakli on karjalan kielellä. Jegor Černišovin ta Anastasija Bukrejevan kirjuttaman käsikirjutukšen vienakši kiänti Galina Lettijeva.
— Konša enšimmäisen kerran nävin tekstin, ajattelin, a mitein šitä voipi kiäntyä? Teksti on ylen vaikie. Tahon šanuo, kuin moločat artistat ollah, jotta opaššuttih omat roolit, vaikka monet heistä ei tiijetä karjalan kieltä ta enšin heilä oli vaikie lukie, kerto näytelmän kiäntäjä Galina Lettijeva.
Spektakli on valmissettu Pienen kotimuan kulttuuri -projektin rajoissa.
