Koštamukšen kaupunkin musejošša avattih uuši etnokulttuurikeškuš Hete-folklorikollektiivie varoin.
Kollektiivilla pitälti oli oma avara huonehut, missä artistat vietettih harjotteluja ta otettih vaštah vierahie. Ka viime vuotena še oli annettu Leo Lankisella nimitetyllä lapšien taitokoululla, jotta järještyä šiinä taiteilijalla Vitalii Dobrininilla nimitetty opaššuškeškuš.
Hete-kollektiivi ta kaupunkin musejon johtokunta šuoššuttih antua rakennuš kunnivoittuan šuurta taiteilijua ta ruvettih kunnoštaman ičellä uutta huonehutta.
Uuvven etnokulttuurikeškukšen disainerina on koštamukšelaini Tatjana Vasiljeva. Hiän yritti koristua huonehta perintehelliseššä karjalaisešša tyylissä.
— Uuvvešša etnokulttuurikeškukšešša ruvetah pitämäh kollektiivin harjotteluja, karjalan kielen kurššija, karjalaisen folklorin tuntija lapšilla, kotišeutuoppituntija ta eri muasteri-oppija, kerrotah Hete-kollektiivin ošanottajat.
Juhlallisissa avajaisissa mukana oltih kaupunkin johtaja Sergei Novgorodov, Koštamukšen kanšallisien šeurojen etuštajat ta kollektiivin yštävät.
Hete-folklorikollektiivi peruššettih vuuvven 1984 šajekuušša. Alkuperäsenä aihenistona esitykšie varoin oltih laulut ta tanššit, a šiitä – starinojen ta spektaklien käsikirjutukšet karjalan kielellä. Niijen luatijina oltih tunnetut karjalaiset kirjailijat, esimerkiksi Juakko Rugojev šekä šäveltäjät ta runoilijat ta iče vienankarjalaiset.