Foto-ozuteluz: Vepsän röunan londuz Ilja Timinan kuviš

Ilja Timinan fotokuvad lujas tuliba mel’he külän eläjile. 6+ Kuva: Irina Sotnikova

Kalages ”Kalarand”-etnoparkas avaižihe vepsläižen fotografan Ilja Timinan foto-ozuteluz ”Meiden röun”. Ilja Timin om tetab fotograf ei vaiše Karjalas, no sen irdpolel-ki. Hän om äjiden Venäman da rahvazkeskeižiden konkursoiden vägestai. Hänen fotokuvid voib nägištada Karjalan da Suomen muzejiš, turistkeskusiš, tedokirjoiš Karjalan polhe, karjalaižiden lehtesiden lehtpolil, a mugažo počtkartaizil da markoil. Nügüd’ hänen fotod čomenzoitaba Vepsän tanhan seinid-ki Kalagen etnoparkas. Kuvil voib nähta čomad londust, mecživatoid, linduid, a mugažo külän eläjiden modkuvid.

— Armastuz fotokuvaha sündui völ laps’aigas. Navedin fotografiruida londust, mecživatoid, linduid. Vepsän ma om armaz. Kodiröun, vepsläižed jured, čoma bohat londuz… kaik nece libutab minun henged, sanub Ilja Timin.  

Ozuteluz om tehtud Vepsän kul’tursebran da Karjalan rahvahaližen i regionaližen politikan ministerstvan tugele ”Elomatk läbi aigas”-projektan aigan.