EtnoSmart-nuorižofourumu jatkau omassah ruaduo
Syvyskuun 7. päviänny Kanzallizen teatran seinis alguh pandu EtnoSmart-nuorižofourmu jatkau omassah ruaduo. Fouruman virralline programmu kesti 7.—9. syvyskuudu.
— Kolme päiviä enämbi 80 fourumalastu vastavui ekspertoin da paginoin pidäjien kel, yhtes hyö šeikuittih aktuallizii kyzymyksii, saneltih omassah ruadokogemukses da valmistettih omii projektoi. Lopputuloksennu roittih ruadojoukkoloin projektoin prezentatsiet. Fourumalazet saneltih omih projektoih nähte da suadih vastuttu ekspertois, on ilmoitettu EtnoSmart-Vk-sivul.
Fourumu jatkuu 10.—14. syvyskuudu Petroskois da Anuksen kanzallizes piiris. Fourumah yhtynyöt ruvetah kehittämäh omii alguhpanoloi, kudamis yhtytäh oma kogemus da muan histourii.
Seiččei päiviä kestäjän fouruman tärgevimii tarkoituksii on opastua nuorii levittämäh yhtenäžyön idejua nygyaigazien keinoloin vuoh da lujoittamah sidä mieldy, ku kanzallizien perindölöi da kul’tuuroin bohatus on kogo Ven’an kanzallizen omaluaduvuon tugi.
Viijendeh kerdah piettäväh EtnoSmart -fourumah oli työtty enämbi 170 zajavkua, fourumalazekse oli vallittu 130 hengie Ven’an eri puolil da Valgoven’alpäi — nuordu, erillizen voinuoperatsieh yhtynytty, opastujua, yhteiskunnallizieh liittoloih kuulujua.
Suurdu piduo valmistetah Ven’an kanzoin kielien vuvven nimeh da kanzallizen Nuorižo da lapset -projektan kannatuksel.
Yhty Oman Median kanualah MAX:as!
