”Kalarand”-etnoparkan tegemine Kalages jatktase. Ezmäižen projektan etapan satuseks tuli vepsän pert’, miččen ezisein om tehtud endevanhan vepsläižiden tehnologijan mödhe. Sigä jo külän eläjad mänetaba erazvuiččid azjtegoid da penid praznikoid.
Nügüd’ zavodihe toine etap – parembzoitta da čomenzoitta pallištod, kus mäneb jogavozne praznik ”Kalarand”. Sijaližiden kivisaskelmižiden organizacijoiden da eläjiden abul om azotadud elektropachid da om tehtud lämoi, tehtihe dorog, laučoid, azotadihe irdekran. Pallištod jo čomitaba erased art-objektad, ozutesikš, ”Vägen alang” da ”Kivisapug”. Lapsile-ki om äi vändoid: čibu, Jagi-baban pertine, sildaine, lapsiden vändsija. A mecan ižand, čoma sur’ kondi puspäi, kuti vorjoičeb necida pallištod.
— Hüvä om, miše ”Kalarand”-etnoparkaha, mitte seižub čomal Änižen järven randal, tuleskeleba ei vaiše Kalagen külän eläjad, no mugažo adivod susedkülišpäi, lidnoišpäi da regionoišpäi. Tägä hö voiba kävelta, kacta kaiken, tehta čomid fotoid da lebaita. Radoid pidab tehta völ lujas äi. Kalagelaižed aktivistad lujas abutaba meile. Jo teravas tegeškandem mastar’-klassoid da sjomkoid, ozutaškandem, kut kudoda verkoid, tehta lämiisijan i ai tošt, sanub Vepsän kul’tursebran pämez’ Larisa Čirkova.
Nece projekt om oigetud vepsän kul’turan kaičendaha, vepsän kelen popul’arizoitandaha noriden keskes, kudambile om melentartušt ičeze ezitatoiden tradicijoid da veroid.