Eri kieldy kuultah Ruskiel lagevol
Moskovas, Ruskiel lagevol 4.—7. kezäkuudu perindön mugah pietäh Kanzallizien literatuuroin festivuali. Pivon programmas on konferensii ”10 vuottu kanzallizien liiteratuuroin kannatusprogrammale: säilyttämizes kehittämizeh”, runoloin lugemizet da Ven’an kanzoin nygyaigaine literatuuru: Pohjazen Kavkuazan kanzoin runohus da prouzu -antolougien prezentatsii.
— Minuu kučuttih Puškinan roindupäivänny, 6. kezäkuudu lugemah Ruskiel lagevol hänen karjalakse kiännettylöi runoloi da sanelemah karjalan kieleh nähte. Mielihyväl suostuin, ku se on hyvä mahto sanella karjalazih da meijän kieleh da kul’tuurah nähte Ven’an keskilinnas, sanoi Oma Mediale Natalja Sinitskaja, Oma Mua -lehten piätoimittai.
Periodika-julguamon ruadajii aivin kučutah yhtymäh kanzallizien literatuuroin festivualiloih. Kanzallizien lehtien toimittajat käydih Moskovas, P’atigorskas, Vladikavkuazas piettylöih programman pidoloih.
Kymmenen vuvven aigah, min kestäy kanzallizien literatuuroin kannatusprogrammu, ilmoih on piästetty yheksä suurdu kogomustu — Ven’an kanzoin runohuttu, prouzua, lapsien kirjalližuttu, dramaturgijua, publitsistiekkua. Yheksäh julgavoh on painettu enämbän migu 700 kirjuttajan tevostu Ven’an kanzoin 57 kielel. Niilöin luvus ollah karjal, vepsä da suomi.
Aihies voit lugie ven'aksegi.
Yhty Oman Median kanualah MAX:as!
