Elissan Šandalovič: “Ehotamma valmistua federalista kuntoutušohjelmua erikoisšotaoperatijon ošallistujie varoin”
Karjalan lakienluajintakokoukšen johtaja, erikoisšotaoperatijon ošallistuja Elissan Šandalovič esitteli ehotukšie Kanšanohjelmah. Niitä valmissettih alovehellisešša On tuloš! -forumissa Petroskoissa 17. šulakuuta. Asiešta kertou Petroskoin piirikunnan hallinto.
— Yksi meijän alottehista on panna käyntih federalista kuntoutušohjelmua erikoisšotaoperatijon ošallistujie ta veteranija varoin. Veteranit ičen šanotah, jotta še on tarvittava. Meijän tašavallašša šemmoni ohjelma toimiu šotaveteranien šairalan šekä tašavallan ta keškuššairalan kuntoutušošaštojen tiloissa. Olemma valmehet esittelömäh omua kokemušta kollegoilla toisista alovehilta. Olen varma, jotta pitäy standartisoija ratkaisuja šoitilahien kuntoutukšen alalla koko Venäjällä. Joka alovehella pitäy olla šamanvertaset raha- ta järješšyšolot, lainuau hallinto Elissan Šandalovičin šanoja.
Toisien alottehien luvušša oli järještyä jouštavua liäketiijollista tutkimušta myöštynyillä erikoisšotaoperatijon ošallistujilla ta antua tietoja heistä liäketiijollisih järještölöih. Šamoin forumin ošallistujat ehotettih etuoikevukšellista psihologista neuvotteluo erikoisšotaoperatijon ošallistujilla ta heijän perehillä.
Yhty Oman Median MAX-kanalah!
