Bubrihan lugemizis rodieu paginua suomelas-ugrilazis
Karjalan piälinnas 17.—18. syvyskuudu pietäh kogo Ven’an XXI tiedokonferensii ”Bubrihan lugemizet: Ven’an luodehpuolen tiedoaloinvälizet gumanitaarizet tutkimukset”. Piduo valmistetah kanzoinvälizen Tiedo rajoittah: tiedoaloinväline yhtehine tutkimusruado -fouruman hantuzis da se on omistettu Karjalan tiedokeskuksen 80-vuozipäiväle.
— Tänä vuon erinomastu huomivuo kiinnitetäh Ven’an luolehpuolen rahvahien kielen, kul’tuuran da histourien tutkimizen tiedoaloinvälizih keinoloih. Konferensieh yhtytäh kui tundietut tiedomiehet, mugai nuoret tutkijat, aspirantat da yliopastujat Ven’an eri puolilpäi: Petroskois, Moskovas, Murmanskas, Sankt-Peterburgas, Kazanis, Smolenskas, Siktivkaras, Voulogdas, Sevastopol’as, Tveris, Jekaterinburgas, Kolomnaspäi, sanoi Oma Mediale Kielen, literatuuran da histourien instituutan piälikkö Irina Novak.
Konferensien parahat ezitykset painetah Studia Nordica - da Petroskoin valdivonyliopiston tiedokirjutukset -žurnualoih.
Konferensiedu valmistau Karjalan tiedokeskuksen Kielen, literatuuran da histourien instituuttu yhtes Petroskoin valdivonyliopiston Filolougien instituutan kel. Pivos vastavutah kielen da histourien tutkijat, etnografat da kul’turolougat, kuduan tutkitah suomelas-ugrilazien kanzoin kul’tuurua da elaigua.
Yhty Oman Median kanualah MAX:as!
