Šyyškuun 6. päivänä täytty 90 vuotta runoilijan Vladimir Brendojevin šyntymäštä. Merkkipäivällä omissettuja kirjallisuštilaisukšie perintehellisešti piettih hänen kotimualla – Aunukšešša ta Aunukšen alovehella.
Petroskoi niise liitty Vladimir Brendojevin vuotispäivän juhlimiseh. Karjalaisien, šuomelaisien ta vepšäläisien kieliresurssikeškukšen ruatajat yheššä Karjalan Rahvahan Liiton jäšenien kera järješšettih merkkipäivällä omissettu kirjallisušilta.
Ohjelmašša oli Sa armas olet -filmin esityš, tutuštumini runoilijan tevokših šekä KT:n kanšallisen ta alovehellisen politiikan ministertijön spesialistin Svetlana Kostinan esityš kuštantamotoiminnan kannatukšešta.
Karjalan kirjallisuon tutkija Natalja Čikina valmisti luvennon Vladimir Brendojevin panokšešta karjalankielisen kirjallisuon kehittämiseh. Luvennošša tutkija kerto Brendojevin kirjallisuošta ta šiitä, mitein še vaikutti toisih karjalaisih runoilijih.
– Vladimir Jegorovičista voipi paissa äijän ta eri puolilta. Miun mieleštä, runoilijan piäšuavutukšena on še, jotta juuri häneštä alko karjalan kielellä kirjuttajien runoilijien šukupolvi. Emmä tiijä, tuntiko Brendojev elämän aikana, kuin hiän vaikutti tulijih kirjailijih ta runoilijih, ka nyt še hyvin näkyy, korošti Natalja Valerjevna omašša esitykšeššä.
Luvennon jälkeh kaikin kačottih Ol’ga Ognevan filmie “Sa armas olet” ta šiitä keškuššeltih kirjailijašta ta hänen runoista.