Nügüd’ audiokirjad om jo änetadud da pandud diskoile. Audiokirjoiden änetushe ühtniba Kalagen, Šoutjärven da Šokšun da Petroskoin Suomalaiž-ugrilaižen školan openikad, Petroskoin universitetan üläopenikad da Vepsän kul’tursebran nored aktivistad. Diskoile om pandud kaks’ kirjad: vepsän rahvahan sarnad da Natalia Silakovan ”Nel’l’ dölod”-sarnoiden kogomuz.
— Ezmäižele diskale om pandud 11 vepsän rahvahan sarnad da toižel — 13 avtoran sarnad. Änetuz om jüged process. Meidenke radoi professionaline änetuzohjandai Larisa Hačeva. Mö pakičim lapsid lugeda än’heze tekstoid äi kerdoid, miše ned kuluižiba čomin. Ku ken konz-ni tegi mugoižen azjan, tedab, kut nece om tarbhašt. Meile om mel’he meiden satuz, sanub Vepsän kul’tursebran pämez’ Larisa Čirkova.
Projektan satuseks mugažo oma tulnuded videorolikad erazvuiččile temoile, miččed om sidotud vepsläižiden eloradoidenke. Nügüd’ audiokirjoid diskoil jagetas vepsän man školihe da kul’turpertihe.
Mugažo kaik sarnoiden änetused da videorolikad voib löuta internetas ”Vepsläine etnopark ”Kalarand” -internetlehtpolel.
Audiokirjoiden da videorolikoiden ezitused jo mäniba Šoutjärven da Šokšun školiš i Petroskoiš. 13. semendkud se mäneb Šoutjärven muzejas da Kalagen školas.
Johtutam, miše ”Vepsläine etnopark ”Kalarand”-projekt tehtas Prezidentan grantoiden fondan raha-abul.