20 vot hö kaičeba rahvahan kul’turad pajatades kodikelel
Tämbei vepsläine ansambl’ ”Randaine”, mitte keratihe vodel 2003 Petroskoiš, praznuičeb ičeze jubilejad.
20 vot tagaze ansambl’ keratihe vepsläižen aktivistan L’udmila Aleksejevan da karjalan kelen opendajan i školan muzikaližen radnikan Lidia Oleševan taguiči. Sid’ L’udmila kucuškanzi ansambl’aha ühtnikoid Vepsän kul’tursebraspäi. ”Randaižen” pajanikoiden jured oma erazvuiččiš vepsän man agjoišpäi.
— Meid kaikid ühtenzoitab armastuz kodikel’he. Mö em tahtoigoi unohtada ičemoi jurid. Kaita vepsän rahvahan kul’turad om meiden ansambl’an pätegend, sanub ”Randaižen” ühtnik L’udmila Aleksejeva.
Nügüd’ ansambl’as om 14 pajanikad. Kaik oma naižed. Da tuli uz’ bajanal vändai Petroskoin konservatorijaspäi. ”Randaižen” repertuaras om 20 pajod vepsän da venän kelel. Ansambl’ ezineb erazvuiččil vepsläižil praznikoil.
