Pandemien aigu da lumikas talvi tyhjendettih kylän tagukset
Priäžän piirin herrallisto da tazavallan virguniekat Karjalan Zakonoinhyväksyndykerähmöspäi yhtes Vieljärven rahvahanke jovvuttih kuundelemah vuoziraportoi säristen vilus Vieljärven kylän kluubas. Se on ammuine vieljärveläzien huoli: kluubu on vahnan lapsien päivykoin lahos talois, kudamas lämmin jo ei pyzy. Karjalazen parluamentan edustai, Priäžän piirin kuruattoru Ol’ga Šmajenik sanoi, ku nygöi tazavallan varal srojitah kluubua Mägriäl Anuksen čupul, sit toinah vuoro tulou Vieljärveh. Yhtelläh varmua niken ei pie, nikudai virguniekku, mindäh sendäh pandemii lujah andoi tiediä Karjalan tazavallan kukkaroh. Vuvven 2021 b’udžiettu on varavonalaine da pahas tietois. Lumikas talvi “pyhkäldi” dostalit jen’gutagukset tielöin suomindoih.
Yhtelläh rahvas kiitettih Vieljärven kylähaldivotaloin piämiesty Aleksandr Čugaidu tielöin puhtahuos pienis kylisgi. Buito moizii tielöi tänä talven ei ole ni Petroskoil. Kylähaldivon hantuzis on 61 suomittavua dorogua. Niilöin kunnostamine da suomindu, pihatulien maksot, kluuban pienet kulut da kylähaldivotaloin kolmen ruadajan palkat ollahgi Vieljärven paikkukunnan vuodehine kukkaro – kaikkiedah läs kahtutostu mil’l’onua rubl’ua. Toizis paikkukunnan kylis virrallizesti palkattuloi ruadajii haldivospäi ei ole, sie ollah muga sanotut kylän vahnimat – stuarostat.
Aptiekan suandu on vieljärveläzien eräs suurii huolii. Aptiekku ei rua kaksi vuottu, sendäh ku sen piendytaloi myös lahostui. Nygöi vai erähii, prostoimbii rohtoloi suau ostua FAPan kauti da rahvas ollah hyväs beketis suajes heile tarvittavii rohtoloi. Priäžän piirin administratsien piälikkö Oksana Gavroš uskaldi panna sen dielon merkile da kiännyttiä Karelfarman Vieljärveh kaččomah da kunnostamah uuzii tiloi aptiekkah niškoi. A kuni tilat roijah valmehet, häi ehoitti pidiä rohtoloi Priäžän bol’ničan kirjoil, a myvvä Vieljärvel.
Lahostunnuzien taloloin dielo muitegi on nägyvis Karjalas. Mainittih, ku niidy tazavallan kirjoil on 721 da vai 46 suadih riiččie mulloi. Vieljärvelgi ihan keskučas on kolme kauhiedu barakkua, kudamat pahendetah kylän nägyö. Niidy ei voija riiččie, sendäh ku sie ollah kirjois rahvas, kudamile zakonan mugah pidäy tarita eländykohtu. Erähis vie eläy rahvastu dai perehty lapsienke. Uuzien eländykohtien srojindu menöy ylen hil’l’ah.
Ližiä lugekkua Omas Muas 24. kevätkuudu
