Maikki Remšujeva: "Kipinä on enemmän kuin lehti"
— Maikki, mimmoni oli šiun taival kuvalehen parissa?
— Ruan “Kipinän” karjalankielisenä toimittajana vuuvvešta 2014. Tulin kuvalehteh hyvällä mielellä, vet miun yštävyš “Kipinän” kera alko jo kouluaikoina. Šuomen kielen tuntiloilla myö lukima ta kiäntimä kuvalehtie, šekä työntimä toimitukšeh omie kirjutukšie ta piiruššukšie. Nyt mie niise kirjutan omie materialija, kiännän tekstijä, kekšin teemoja ta keryän lehen karjalaista numeruo. Še on miun elämän tärkie oša.
— Mitä tykkyät toimittajan ruavošša eniten?
— Milma miellyttäy kekšie uušie idejoja, jotta “Kipinäštä” tulis mukava kuvalehti lapšilla. Mie tykkyän yhteyttä nuorih lukijih – tapuamisie lapšien kera, koululaisien omie šivuja leheššä. On miellyttävä nähä, jotta lapšet vuotetah uutta numeruo ta šuahah tietyä šiitä mitänih uutta Karjalašta. Miun työššä tärkietä on še, jotta kuvaleheštä ois hyötyö tuntiloilla, jotta šiitä tiijettäis niise ne, ket ei opaššeta muamonkielie.
— Eruouko karjalaini numero toisista?
— Karjalaini numero on erikoini šillä, jotta še on karjalan kielen kahella murtehella. Lehti auttau lapšie opaštuo muamonkieltä starinojen, pelien, arvautukšien ta mukavien tehtävien kautti. Mie staraičen luatie kaikki materialit šelviksi, hyviksi ta nykyaikasiksi.
— Onko vaikie tänäpiänä šuaha lapšet kiinnoštumah lukomisešta?
— Nyt koululaisilla on vaikiempi lukie pitkie tekstijä, šentäh kun ympärillä on äijän tietoja ta teknologijoja. Šentäh pitäy yrittyä luatie kuvaleheštä visualini, lisätä šiih kuvie, piiruššukšie, šarjakuvie, tehtävie ta interaktiivisie elementtijä. Piäasiena on še, jotta lukomini olis mielenkiintoni.
— Mimmosie rubriikkija lukijat eniten tykätäh?
— Ajattelen, jotta koululaiset eniten tykätäh šivuja, missä on aivopähkinöjä, arvautukšie ta kilpailuja. A vielä kaikkie miellyttäy Oma palšta -rubriikki, missä on lapšien piiruššukšie ta kirjutukšie, šentäh kun šielä voipi nähä omie töitä tovellisešša kuvaleheššä.
— Mintäh šiula on tärkie šäilyttyä karjalan kieli?
— Miušta kieli on rahvahan muisto, šen istorija ta kulttuuri. On hyvin tärkie, jotta lapšet tiijettäis muamonkieltä, omie juurija ta Karjalan perintehie.
— Mitä tahtosit toivottua “Kipinän” lukijilla?
— Tahon toivottua, jotta lapšet ei varattais luuvva, lukie, kirjuttua ta paissa karjalan kielellä. Pieniki kiinnoššukšen kypinä voipi kašvua šuurekši tulekši!
